മൂന്നാമത് ഡോ.ഖമറുദ്ദീൻ സ്മാരക പരിസ്ഥിതി പുരസ്കാരത്തിന് നാമനിർദ്ദേശം ക്ഷണിച്ചു

 

കേരളത്തിലെ പ്രമുഖ സസ്യശാസ്ത്രജ്ഞനും പശ്ചിമഘട്ടത്തിന്റെ പാരിസ്ഥിതിക പ്രാധാന്യം ലോകത്തിന് പരിചയപ്പെടുത്തിയ പ്രധാന വ്യക്തികളിൽ ഒരാളുമാണ് ഡോ. എം. ഖമറുദ്ദീൻകുഞ്ഞ്.

കേരള യൂണിവേഴ്സിറ്റി ബോട്ടണി വിഭാഗം അസോസിയേറ്റ് പ്രൊഫസർ ആയിരുന്ന അദ്ദേഹം പെരിങ്ങമ്മല ഇക്ബാൽ കോളേജ്, പാലോട് ട്രോപ്പിക്കൽ ബൊട്ടാണിക്കൽ ഗാർഡൻ & റിസർച്ച് ഇൻസ്റ്റിറ്റ്യൂട്ട് എന്നിവിടങ്ങളിൽ പ്രവർത്തിച്ചിട്ടുണ്ട്. 

ബോട്ടണി ബിരുദാനന്തര ബിരുദം ,എൽ‌.എൽ‌.ബി, എൽ‌.എൽ‌.എം. എന്നിവയിൽ റാങ്ക് ഹോൾഡറായിരുന്നു. നിരവധി അവാർഡുകളും അംഗീകാരങ്ങളും കരസ്ഥമാക്കി.

തിരുവനന്തപുരം ജില്ലയിലെ പെരിങ്ങമല പഞ്ചായത്തിന്റെ ജൈവവൈവിധ്യ രജിസ്റ്റർ തയ്യാറാക്കുന്നതിൽ മുഖ്യപങ്കു വഹിച്ചിട്ടുണ്ട്. പശ്ചിമഘട്ടത്തിലെ ജൈവവൈവിധ്യത്തെക്കുറിച്ചുള്ള പഠനത്തിലൂടെ ഡോക്ടറേറ്റ് നേടി. 

വാട്ട്സ്ആപ്പ് ഗ്രൂപ്പിൽ ഭാകമാകൂ

പശ്ചിമഘട്ടത്തെക്കുറിച്ചുള്ള മാധവ് ഗാഡ്ഗിൽ കമ്മീഷൻ (പശ്ചിമഘട്ട പരിസ്ഥിതി, പരിസ്ഥിതി വിദഗ്ധ പാനൽ) റിപ്പോർട്ടിൽ അദ്ദേഹത്തിന്റെ പഠനത്തെ പറ്റി പരാമർശമുണ്ട്. എന്നാൽ, റിപ്പോർട്ടിലെ ശിപാർശകൾ കേരളത്തിൽ അവഗണിക്കപ്പെടുന്നതായി കണ്ടതോടെ അതിന്റെ പ്രാധാന്യത്തെക്കുറിച്ച് ജനങ്ങളിൽ അവബോധം വളർത്താൻ അദ്ദേഹം നിരവധി ശ്രമങ്ങൾ നടത്തി. പരിസ്ഥിതി പ്രവർത്തകനെന്ന നിലയിൽ, പ്രകൃതിയോടുള്ള തെറ്റായ സമീപനങ്ങളെ അദ്ദേഹം എല്ലായ്പ്പോഴും ചോദ്യം ചെയ്യുകയും വനമേഖലയുടെയും അതിന്റെ വൈവിധ്യമാർന്ന ജീവിത രൂപങ്ങളുടെയും സംരക്ഷണത്തിനായി നിലകൊള്ളുകയും ചെയ്തു. 

പെരിങ്ങമ്മല പഞ്ചായത്തിൽ നടന്ന അക്കേഷ്യ മാഞ്ചിയം സമരം, കാട്ടുജാതിക്ക ശുദ്ധജല ചതുപ്പിനോട് ചേർന്ന് സ്ഥാപിക്കാൻ ശ്രമിച്ച ഐ,എം,എ മെഡിക്കൽ മാലിന്യ പ്ലാന്റിനെതിരായ സമരം,പെരിങ്ങമ്മല ഖരമാലിന്യ വിരുദ്ധ സമരം എന്നിവയിലും അമരക്കാരനായിരുന്നു. പഞ്ചായത്തിലെ ജൈവ വൈവിധ്യ മാനേജ്മെന്റ കമ്മിറ്റി(ബിഎംസി)യുടെ കേ ഓർഡിനേറ്റർ ആയിരുന്നു.

യൂട്യൂബ് ചാനലിൽ അംഗമാകൂ

പ്രകൃതിയെയും ജൈവവൈവിധ്യത്തെയും സംരക്ഷിക്കുവാനും ജനങ്ങളെ സേവിക്കാനും  ജീവിതം സമർപ്പിച്ച അദ്ദേഹം 2019 നവംബർ 13 ന് വിട വാങ്ങി. 

പശ്ചിമഘട്ടത്തെയും അതിലെ ജൈവ വൈവിധ്യത്തെയും നിത്യഹരിതമായി നിലനിർത്തണമെന്ന് സ്വപ്നം കണ്ട പ്രശസ്ത ശാസ്ത്രജ്ഞനും പരിസ്ഥിതി സംരക്ഷകനുമായ ഡോ. എം. ഖമറുദ്ദീൻ സാറിന്റെ സ്മരണാർത്ഥമാണ് ഈ പുരസ്കാരം നൽകുന്നത്.

അദ്ദേഹത്തോടുള്ള ആദരവിനൊപ്പം, സമാന കാഴ്ച്ചപ്പാടിൽ  പ്രവർത്തിക്കുന്ന ഓരോ വ്യക്തിക്കും സംഘടനയ്ക്കും ഈ പുരസ്കാരം ഒരു പ്രോത്സാഹനവും അംഗീകാരവും കൂടിയാകണമെന്നാണ് ഡോ കമറുദ്ദീൻ ഫൗണ്ടേഷൻ ലക്ഷ്യമിടുന്നത്.

ഡോ. കമറുദ്ദീൻ ഫൗണ്ടേഷൻ ഫോർ ബയോഡൈവേർസിറ്റി കൺസർവേഷൻ (KFBC)

രാജ്യത്തിന്റെ കാർഷിക സംസ്കൃതിയിലും ജനജീവിതത്തിലും പശ്ചിമഘട്ട മലനിരകൾക്കുള്ള പ്രാധാന്യം തിരിച്ചറിഞ്ഞ്  സുസ്ഥിര വികസനത്തിലൂടെ ജൈവ വൈവിധ്യ സമൃദ്ധമായ പരിസ്ഥിതിയെ  പരിപോഷിപ്പിച്ച് സംരക്ഷിക്കുക എന്നതാണ് ഡോ. ഖമറുദീൻ ഫൗണ്ടേഷന്റെ പ്രഖ്യാപിത ലക്ഷ്യം.

ഫേസ്ബുക് ഗ്രൂപ്പിൽ അംഗമാകൂ

മനുഷ്യ ഇടപെടലുകളാൽ ഏറെ ദുർബലമായിക്കൊണ്ടിരിക്കുന്ന പശ്ചിമഘട്ടമാണ് കേരളത്തിന് സുഖശീതളമായ കാലാവസ്ഥയും ഭക്ഷ്യ വിഭവങ്ങളും പ്രദാനം ചെയ്ത് 'ദൈവത്തിന്റെ സ്വന്തം നാട്' എന്ന ഖ്യാതി നേടി തന്നത് എന്നത് നമ്മൾ സൗകര്യപൂർവ്വം മറക്കാൻ ശ്രമിക്കുന്നു. ജനതയുടെയും അധികാരികളുടെയും ഇടയിൽ 'പശ്ചിമഘട്ടമില്ലെങ്കിൽ കേരളമില്ല' എന്ന സന്ദേശ മെത്തിക്കുവാനും, തലമുറകളിലേക്ക് ആ തിരിച്ചറിവ് കൈമാറ്റം ചെയ്ത് ജൈവ വൈവിധ്യ കലവറയായ നമ്മുടെ നാടിന്റെ സർവ്വകാല വിസ്മയത്തെ ലോകത്തിന് മുന്നിൽ  പ്രോജ്ജ്വലിപ്പിച്ച് നിർത്തി പരിസ്ഥിതി പരിപാലനം ലക്ഷ്യമിടുന്നതാണ്  ഫൗണ്ടേഷന്റെ പ്രവർത്തന പരിപാടി.

 പരിസ്ഥിതി സംരക്ഷണത്തിലൂടെ മാനവികതയുടെ ഐക്യപ്പെടലും, ജനാധിപത്യ സംരക്ഷണവും ഫൗണ്ടേഷന്റെ പ്രവർത്തന മണ്ഡലങ്ങളിൽ വരുന്നു. പശ്ചിമഘട്ടത്തിന്റെ സന്തതികളും യഥാർത്ഥ സംരക്ഷകരുമായ ആദിവാസി വിഭാഗങ്ങൾ ആട്ടിപ്പായിക്കപ്പെടുകയും അന്യവത്ക്കരിക്കപ്പെടുകയും ചെയ്യുന്നതും, നീതിപൂർവമായി വിഭവങ്ങൾ പങ്ക് വയ്ക്കപ്പെടാത്ത ജനാധിപത്യവിരുദ്ധ പ്രവർത്തനങ്ങൾ  തടയുകയും ചെയ്യുക എന്നതും ഫൗണ്ടേഷൻ ലക്ഷ്യമിടുന്നു. 

നശിച്ച് പോയതോ വംശനാശ ഭീഷണി നേരിടുന്നതോ ആയ ജീവജാലങ്ങളെ സംരക്ഷിക്കുന്നതിനും, പരിപോഷിപ്പിക്കുന്നതിനും വരും തലമുറക്ക് ഉചിതമായ അവബോധം നൽകുക എന്നതും ഫൗണ്ടേഷന്റെ പ്രധാന ലക്ഷ്യങ്ങൾ ഒന്നാണ്.

ഫേസ്ബുക് പേജിൽ അംഗമാകൂ

25000 രൂപയും, പ്രശംസ പത്രവും മെമൊന്റൊയും ഉൾപ്പെടുന്നതാണ് ഡോ ഖമറുദീൻ പരിസ്ഥിതി സംരക്ഷണ അവാർഡ്. ഡോ ഖമറുദീൻ ഓർമദിനമായ നവംബർ 13നു കാര്യവട്ടം ബോട്ടണി ഡിപ്പാർട്ട്മെന്റിൽ വെച്ച് നടക്കുന്ന ചടങ്ങിൽ അവാർഡ് നൽകുന്നതായിരിക്കും.

പരിസ്ഥിതി സംരക്ഷണ പ്രവർത്തനങ്ങൾക്ക് നേതൃത്വം കൊടുക്കുന്ന വ്യക്തികൾക്കാണ്  ഇപ്പ്രാവശ്യം നോമിനേഷൻ സമർപ്പിക്കാവുന്നത്. സെപ്റ്റംബർ 28 മുതൽ ഒക്ടോബർ 30 വരെയാണ് ഓൺലൈൻ വഴി നാമനിർദേശം നൽകേണ്ടത്.

കൂടുതൽ വിവരങ്ങൾക്ക്

സെക്രട്ടറി,

സാലി പാലോട്

9446103690, 89210 86484